Аудандық «Руханият» орталығында «Отбасы құндылықтары және дәстүр» тақырыбында ұлттық тәрбие мен рухани құндылықтарды дәріптеген мазмұнды дөңгелек үстел ұйымдастырылды.

Тағылымды шараға Қаратерең, Шөмішкөл, Жаңақұрылыс ауылдарынан келген өнегелі отбасылар мен «Анаға тағзым» орталығының қызметкерлері, кітапхана оқырмандары қатысты.

Шара аясында халқымыздың терең мәнге ие «Сүйек жаңғырту» дәстүрінен сахналық пролог қойылып, көрермен қауымға ұлттық салттың тәрбиелік әрі рухани маңызы кеңінен насихатталды. Көрініс арқылы ата дәстүрдің ұрпақ санасындағы орны мен туыстық байланысты нығайтудағы мәні әсерлі жеткізілді.

Шараның арнайы қонақтары Қаратерең, Шөмішкөл, Жаңақұрылыс ауылының үлгілі отбасылары отбасы бірлігі мен құндылығы туралы ой өрбітіп, өз өнерлерін көрсетіп, отбасындағы дәстүрге айналған ұлттық құндылықтары - қолөнер бұйымдары мен ұлттық тағамдарын кеңірек таныстырды.

Кездесу барысында қатысушылар мен оқырмандар арасында танымдық сұрақ-жауап ұйымдастырылып, ұлттық дәстүр, отбасы тәрбиесі, қазақы құндылықтар жөнінде пікір алмасу өрбіді.

Ұлттық құндылықтарды ұлықтап, отбасы берекесін дәріптеген бұл басқосу — рухани сабақтастықты нығайтқан, тәрбиелік мәні зор мазмұнды кездесу болды.
Кеш соңында аудандық мәдениет және тілдерді дамыту бөлімінің басшысы Б.Махатов құттықтау сөз сөйлеп, үлгілі отбасыларға сый - сыяпаттар табыстады.

Шара аясында "Отбасы - өмір шуағы" атты кең көлемді кітап көрмесі көпшілік оқырманға таныстырылды.