Руханият орталығында Аманөткел ауылдық кітапханасының ұйымдастыруымен өлкетанушы, бірнеше кітаптардың авторы Тәңірберген Дәрменовпен «Өлке сырын өрнектеген тұлға» атты кездесу кеші өткізілді.

Кешке аудандық мәдениет және тілдерді дамыту бөлімінің басшысы Б. Махатов, ақын- жазушылар, зиялы қауым өкілдері мен кітапхана оқырмандары қатысты.
Сыр бойы — талай саңлақты дүниеге әкелген киелі мекен.

Бұл топырақтан елдің сөзін сөйлеген шешендер, жырын тербеген ақындар, тарихын түгендеген тұлғалар шыққан.

Солардың бірі — туған жердің тағдырын жүрек сүзгісінен өткізіп, өлкенің өткені мен бүгініне қалам арқылы жан бітірген өлкетанушы, бірнеше кітаптардың авторы, руханият жанашыры — Тәңірберген Сейтжанұлы Дәрменов.

Кездесу кеші кештің құрметті қонағы Тәңірберген Дәрменовтің өмірі мен еңбек жолына арналған видеороликпен бастау алды.

Кешті Аманөткел ауылдық мәдениет үйінің қызметкері Муат Ералиев жүргізіп, өлке тарихынан сыр шертіп, Арал ауданында еңбек еткен Тәңірберген Дәрменовке сұрақтар қоя отырып, сырлы сұқбат құрды.

Тәңірберген Сейтжанұлы — саналы ғұмырын ел қызметіне арнаған тұлға.

Ұстаздық жолы — өнеге, мемлекеттік қызметі — абырой, ал өлкетанушылық еңбегі — рухани мұра.

Ол кісінің зерттеулері арқылы талай тарихи дерек жаңғырып, көмескі қалған есімдер қайта сөйлегендей болды.

«Мырзастан шықты шайырлар», «Ишандар өткен ғұлама, хабар берген Алладан» секілді еңбектері — ұлттық руханият қорына қосылған қымбат дүниелер.

Шара барысында ақын жазушылар, үзеңгілес достары, ауданның зиялы қауым өкілдері Тәңірберген Дәрменовтің еңбектері мен шығармашылығына тоқталып, жылы лебіздерін білдіріп , өнерпаздар әннен шашу шашты.

Кеш соңында «Өлке тарихын зерделеген зерттеуші» тақырыбында кітап көрмесі таныстырылды.