Құрметті сайт қонақтары!

23 сәуір - Ұлттық кітап және кітапханашылар күніне орай Ә.Тәжібаев атындағы облыстық әмбебап - ғылыми кітапханасында ұйымдастырылып жатқан мерекелік шараға Арал аудандық орталықтандырылған кітапханалар жүйесі "Жасанды интеллект және кітапхана" атты кітап көрмесін ұйымдастырды.

Заманауи жабдықталған кітап көрмесіне Қызылорда қаласы тұрғындары мен кеш қонақтары ерекше назар аударып, қызығушылық танытты.

Қазіргі заман – білім мен технологияның тоғысқан дәуірі. Осы бағытта ұйымдастырылған «Жасанды интеллект және кітапхана» көрмесі – дәстүрлі кітап әлемі мен цифрлық инновацияның үйлесімін айқын көрсететін ерекше алаң.

Ұлттық кітап күні аясында «Жүз кітап — жүз қазына» жобасының кезекті «Жүз кітап: Руханиятқа жүз қадам» атты ерекше форматтағы жанды кітап кеші ұйымдастырылды. Шараға Арал индустриялды-техникалық колледжі, Жастар ресурстық орталығы, Халыққа қызмет көрсету орталығы және З. Шүкіров атындағы қалалық мәдениет үйінің қызметкерлері қатысты.

Кештің басты ерекшелігі — қатысушылар оқыған туындыларын «жанды кітап» форматында таныстырды. Әр мекеме өкілдері таңдалған шығармаларды жай ғана баяндап қоймай, терең талдау жасап, арнайы қойылымдар мен мазмұнды шолулар арқылы автордың негізгі идеясын көрерменге жеткізді. Бұл басқосу мемлекеттік және қоғамдық қызметкерлердің кітап оқу мәдениетіндегі жетістіктерін айқындап, оқуға деген құштарлықтың жаңа белесін көрсетті.

Руханият орталығында Аудандық орталық кітапхананың ұйымдастыруымен көрнекті ақын, жазушы, халықаралық сыйлықтардың лауреаты Шөмішбай Сариевтің туғанына 80 жыл толуына орай “Ақын өмірінен сыр” атты әдеби кеш өтті.

Шараға кітапхана оқырмандары, зиялы қауым өкілдері мен әдебиет сүйер қауым қатысты.

Әдеби кештің мақсаты – ақынның өнегелі өмірін еске алу, шығармашылығын насихаттау.

Кеш барысында ақынның өмір жолы мен әдеби мұрасы туралы айтылып, оның шығармаларының мәні мен философиялық тереңдігі талқыланды.

Руханият орталығында "Арал аудандық орталықтандырылған кітапханалар жүйесінің" ұйымдастыруымен жерлесіміз, талантты ақын, айтыскер,ұстаз, Мәдениет саласының үздігі, Қазақстан Жазушылар одағының мүшесі ЕРЖЕҢІС ТАСТЫБАЙҰЛЫНЫҢ шығармашылығына арналған "Ержеңіс - асыл өнердің алып нары" атты кездесу кеші өткізілді.

Өлең мен өмір, оқырман мен ақынның рухани байланысын нығайтқан тағылымды кешті "Amanat" партиясының Арал аудандық филиалының атқарушы хатшысы Т.Қанатов ашып, ақынға ыстық ықыласын жеткізіп, Арал ауданы әкімінің алғыс хаты мен сый - сыяпатын табыстады.